محدش يفهمني غلط!!!!!

تعالى نحسبها

تعالى نحسبها بالعقل وبلاش نتهور و بلاش نتسرع
فى كام حاجة لازم تبقى موجودة محتاجين حد يتبرع

ده فى شبكة وهتبقى الدنيا ربكة وآه ده الحالة مش مساعدة
وكمان فى حفلة ولازم رقاصة وزفة لماما وبابا يدونى علقة

دى جوازة مش جنازة هنجيب الزاى التلاجة ولا حتى المكوة
طيب اوضة النوم مقدمها منين ولا عايزانا نروح أنا وانتى هفوة

والفرش منين ولا للجيران هنبقى مكشوفين ونقول اصل الجو حر
يا حبيبتى بلاش تعقيد الجواز يعنى تقليد أعمى ومحدش فينا مضطر

طب قولى لى أروح ازاى لبابا واقول له ياعم الحج طالب القرب منك
وأقول له ازاى أنا معنديش حتى شقة أعيش فيها أنا والمحروسة بنتك

يقول مالكش لزمة روح اضرب نفسك بالجزمة وماشوفش وشك تانى
ويفضل يشتم فيا ويفرج جيرانكم عاليا ومش بعيد يرمينى فى ثوانى

ويا خوفى من مامتك تمسكنى نظرات ومن تحت الضرس ابتسامات
وافضل طول مانا قاعد مع ابوكى تروح تجيب لى أشرب فى حاجات

سيبك من كل ده مش هنتكلم فيه ولا قبليه بس بعد كدا قولى لى ايه هنعمله
لو اتحملتى شهر هتعملى ايه بعد شهرين ما احنا نختصر الطريق من أوله

طب نجيب عيال نظلمهم ونكتم على نفسهم ويطلعوا معقدين
ونفضل نخنق فيهم ونطلع القديم والجديد عليهم يروحو ماشيين

ولا يا سلام على مدارسهم وكمان دروسهم واشوف أنا طلوع العين
حرام عليكى تظلمينى أبوس ايديكى ارحمينى أنا من صفوف التعبانين

بلا حب بلا كلام فارغ هو أنا يا حبيبتى ونبى ناقص
مافيش حب يا حبيبتى دلوقتى ده بقا حوار فاكس

يابنت الناس بلاش حيرة الحسبة دى هى الواقع
وأنا بصراحة اليومين دول ملطشة معايا وواقع

الموضوع ده فاشل تعالى نفضها بقا سيرة
الدنيا حلوة ولسة الحياة قدمنا سكتها طويلة


تعالى نحسبها
ومتنسوش محدش يفهمني غلط
ازيكم بقا